32’emîn Civîna Asayî ya Lijneya Giştî ya Konseya Bajarê Amedê, ku bi rojeva parastina mîrateya dîrokî û xwezayî hatibû lidarxistin, ji ber nîqaşa “dagirkeriyê” rastî aloziyê hat. Piştî bertekên tund, Parlamenterê DEM Partiyê Serhat Eren daxuyaniya xwe sererast kir û lêborîn xwest.
Rojeva Sereke: Hewsel û Pira Dehderî
Civîn bi dirûşma “Bila Hewsel bêhna reyhanê bide, Dîcle azad biherike, Pira Dehderî ji gel re bimîne” dest pê kir. Di nav beşdaran de Hevşaredarên Bajarê Mezin, parlamenter, nûnerên saziyên sivîl, esnaf û hilberînerên Baxçeyên Hewselê hebûn. Mijara sereke ya civînê ev xal bûn:
- Avahiyên bêdestûr ên li derdora mîrateyên dîrokî.
- Parastina ekolojiya Çemê Dîcleyê.
- Pirsgirêka dagirkirina qadên giştî.
Gotina “Dagirkeriyê” Salon Tevlihev Kir
Piştî axaftina Parlamenterê CHP’ê Sezgin Tanrıkulu, Parlamenterê DEM Partiyê Serhat Eren mafê axaftinê girt. Eren, di nirxandina xwe ya li ser rewşa Baxçeyên Hevselê û Pira Dehderî de îfadeya “dagirkeriyê” bikar anî. Ev gotin bûn sedema nerazîbûna beşdaran. Komeke di salonê de bi qîrîn û çepikan protesto nîşan da û daxwaz kirin ku Eren gotina xwe paşve bikişîne.
Hewldanên Serra Bucak û Dogan Hatun
Ji ber zêdebûna aloziyê, Hevşaredara Bajarê Mezin a Amedê Serra Bucak derket ser kursiyê û ji bo aramkirina girseyê demeke dirêj hewl da. Di heman demê de Hevşaredar Dogan Hatun û Sezgin Tanrıkulu jî ketin navberê da ku alozî mezin nebe. Bi mercê ku mafê axaftinê bidin aliyê nerazî, beşdar li cihên xwe rûniştin.
Serhat Eren: “Lêborîn Xwest”
Piştî ku aramî hat dabînkirin, Serhat Eren careke din derket ser kursiyê û diyar kir ku mebesta wî ne heqaret e û gotinên wî bi şaşî hatine famkirin. Eren ji ber vê şaşfambûnê ji beşdaran lêborîn xwest.
Civîn piştî navbereke kurt, bi axaftinên nûnerên saziyan û welatiyan berdewam kir…
/Nûçe: Mordem Zel/
Nupel