Tifaqa Azadî û Demokrasiyê ya Kurd ku Partiya Çep a Kesk li gel partiyên din ên Kurdistanê ava kiriye, dê sibe deklarasyona xwe ya têkildarî hilbijartinên 14’ê Gulanê eşkere bike.
Partiya Çep a Kesk ku pêkhateya Tifaqa Ked û Azadiyê ye, bi partiyên siyasî yên Kurdistanê re Tifaqa Azadî û Demokrasiyê ya Kurd ava kiribû. Tifaqa Azadî û Demokrasiyê ya Kurd dê sibe deklarasyona xwe ya têkildarî helwesta hilbijartinên 14’ê Gulanê eşkere bike. Deklarasyon dê li Eywana Dawetan a Ayaz Elegence ya li Peyas a Amedê bê ragihandin û Hevserokê Kongreya Civaka Demokratîk (KCD) Berdan Ozturk, Hevseroka Giştî ya Partiya Herêmên Demokratîk (DBP) Saliha Aydenîz, Hevberdevka Partiya Çep a Kesk Çîgdem Kiliçgun Uçar, Hevserokê Giştî yê Partiya Demokratîk a Gelan (HDP) Mîthat Sancar, Serokê Giştî yê Pariya Azadî Ayetûllah Aşitî, ji Komeleya Şoreşger Demokrat a Kurd Abdulhey Okumuş, Serokê Giştî yê Partiya Însan û Azadiyê (PÎA) Mehmet Kamaç, Serokê Giştî yê Partiya Komunist a Kurdistanê (KKP) Sînan Çîftyurek û Serokê Giştî yê Partiya Sosyalîst a Kurdistanê (PSK) Bayram Bozyel dê tev li daxuyaniyê bibin. Tê payîn ku civîna deklarasyonê saet di 11.00’an de dest pê bike.
MA