Medyayên Îsraîlê ragihandine ku êrîş li bajarê Bney Brak ê li rojhilatê Tel Avivê çê bûye. Li gor rayedarên hikûmeta Îsraîlê, di êrîşan de 5 kesan canê xwe ji dest dane û 6 kes birîndar bûne.
Piştî êrîşê Serokwezîrê Îsraîlê Naftali Bennett civîneke bilez a awarte ligel wezîrên navxwe û berevaniyê yên welat û herwiha berpirsên saziyên istixbaratê pêk anî.
Di nava hefteyekê de ev duyemîn êrîşa çekdarî li Îsraîlê bû.
Li gor medyayên Îsraîlê, kesê êrîşkar Felestînî û ji bajarê Cenînê ye ku dikeve nav sînorê desthilata rêveberiya Felestînê.
Medyayên Îsraîlê hin dîmen belav kirine ku têde kesek tê dîtin cilên reş li xwe kirine û çekek di destê wî de ye û teqe li derdorê û otomobîlan dike.
Roja Yekşembiyê 27ê Adarê êrîşek li nêzîk bajarê Haifa çê bûbû û di wê êrîşê de jî 2 polîsên Îsraîlî hatibûn kuştin. Rêxistina DAIŞê paşê berpirsyariya êrîşê li xwe girt.
Heftiya bihorî jî li Beer Sheba di êrîşeke din de 4 Îsraîlî hatibûn kuştin û 2 kes jî hatibûn birîndarkirin.
Li gor medyayên Îsraîlê, erebekî Îsraîlî ji bajarokê Bedouin li başûrê wî welatî êrîş pêk aniye ku paşê ji aliyê hêzên ewlehiyê ve hat kuştin.
Rudaw