Serokê Rêxistna Mafên Mirovan a Kurdistanê, Mihemedsidîq Kebûdwend ku 10 sal e di zîndanên Îranê de girtî ye, ji bo wergirtina xelata Nobel a Aştiyê hat kandîdkirin.
Kurdekî Rojhilatê Kurdistanê ji aliyê Partiya Sosyalîsta Çep a Norwêjê ve bo wergirtna xelata Nobel a Aştiyê hate namzedkirin.
Li gorî agahiyan, li ser daxwaza Komîteya Karkirin bo Pêdana Xelata Nobel a Aştiyê bi Mihemedsidîq Kebûdwend , parlamenterekî Partiya Sosyalîsta Çep a Morwêjê navê Kebûdwend weke namzedê wergirtna xelata Nobel a Aştiyê tomar kiriye.
Mihemedsidîq Kebûdwend xelkê Rojhilatê Kurdistanê ye û Serokê Rêxistina Mafên Mirovan a Kurdistanê ye. Ji ber çalakiyên wî yên bo parastina mafên mirov li Rojhilatê Kurdistanê, ji aliyê hikûmeta Îranê ve hatiye girtin û zêdetirî 10 salan e ku di girtîgehê de ye.
Biryar e li welatên Ewropayê, ji bo piştgiriya pêdana xelata Nobel a Aştiyê bi kebûdwend, kempînek destpê bike.
Pêştir jî 3 caran Kebûdwend ji bo wergirtina xelata Nobel a Aştiyê hatibû namzedkirin, lê ew xelat bi wî nehatibû dayîn.
Heyama 10 sal û 6 mehan e ku Kebûdwend zîndanî ye û biryar e heta meha Gulan a îsal cezayê wî yê girtîgehê bi dawî bibe.
Her çend li gorî yasaya cezakirinê ya Îranê, zîndanî dikarn 3 mehan berî temambûna heyama cezaya xwe werin azadkirin, lê belê daxwaza Kebûdwend ji bo azadkirina wî 3 mehan berî bi dawî hatina heyama zîndanê, ji aliyê dezgeha Dadê ya Îranê ve hatiye redkirin.
RUDAW